भारतीय जनता पक्ष: कमळाबाई पुणेकरांवर रुसली – bjp ignore pune people

0
27
Spread the love

म. टा. प्रतिनिधी, पुणे

तब्बल सहा आमदार आणि एक खासदार अशी भरघोस साथ दिल्यानंतरही भारतीय जनता पक्षाच्या प्रदेश शाखेत पुण्यातील कार्यकर्त्यांना पुन्हा ‘त्यागाची’ संधी मिळाली आहे. प्रदेश पदाधिकाऱ्यांमध्ये शून्य, मोर्चा अध्यक्षांमध्ये एक, सेलच्या (प्रकोष्ठ) संयोजकपदी तीन आणि तब्बल ६८ जणांच्या कार्यकारिणीत चार, अशा पदांवर पुणेकरांची बोळवण करण्यात आली आहे. विशेष म्हणजे पक्षाचे प्रदेशाध्यक्ष चंद्रकांत पाटील हे पुण्यातून निवडून आल्यानंतरही पक्षाने येथील कार्यकर्त्यांकडे पाठ फिरविली आहे.

गेली सहा वर्षे पुणेकरांनी वेगवेगळ्या निवडणुकांमध्ये भाजपला भरघोस साथ दिली आहे. २०१४ मध्ये भाजपचे खासदार आणि आठही आमदार विजयी झाले. त्यानंतर झालेल्या महापालिका निवडणुकीत पुणे महापालिकेत तब्बल शंभर नगरसेवक विजयी करून पुणेकरांनी एकहाती सत्ता दिली. त्यानंतर २०१९ मध्ये भाजपचे गिरीश बापट यांनी तब्बल सव्वातीन लाख मतांनी लोकसभेत विजय मिळविला. त्यापाठोपाठ विधानसभेच्या आठपैकी सहा जागांवर भाजपचे आमदार विजयी झाले आहेत. त्यामध्ये कोथरूडमधून भाजपचे प्रदेशाध्यक्ष चंद्रकांत पाटील यांचाही समावेश आहे.

मात्र, इतकी ताकद दिल्यानंतरही भाजपच्या नव्या कार्यकारिणीत पुण्यातील एकाही कार्यकर्त्याला पदाधिकाऱ्यांमध्ये स्थान मिळालेले नाही. गेल्या काही दिवसांमध्ये पुण्यातील काही ज्येष्ठ कार्यकर्त्यांना प्रदेशावर स्थान मिळणार, अशा जोरदार चर्चा होत्या. मात्र, त्यांना पुन्हा एकदा भाजपच्या परंपरेतील ‘त्यागाची’ संधी मिळाली आहे. इतकेच नव्हे; तर यापूर्वीचे प्रदेश उपाध्यक्ष योगेश गोगावले, चिटणीस मेधा कुलकर्णी यांचीही केवळ ६८ जणांच्या कार्यकारिणीत सदस्य म्हणून बोळवण करण्यात आली आहे. त्यांच्याशिवाय श्वेता शालिनी, गणेश बीडकर आणि पुणे ग्रामीणमधून बाळा भेगडे यांची कार्यकारिणीत निवड झाली आहे.

यापूर्वी युवा मोर्चाचे प्रदेशाध्यक्ष असलेले माजी आमदार योगेश टिळेकर यांची इतर मागासवर्गीय जाती मोर्चाच्या (ओबीसी) प्रदेशाध्यक्षपदी निवड झाली आहे, तर माजी खासदार प्रदीप रावत यांची बुद्धिजीवी सेलचे संयोजक म्हणून निवड झाली आहे. त्याशिवाय माजी सैनिक सेलच्या संयोजकपदी नारायण अंकुशे आणि कामगार सेलच्या संयोजकपदी गणेश ताठे या पुणेकरांना स्थान मिळाले आहे. कार्यकारिणीत निमंत्रित म्हणून बाळासाहेब गावडे, शिवाजीराव भुजबळ, शामराव चकोर, दीपक मिसाळ, शेखर मुंदडा आणि विकास रासकर यांना संधी देण्यात आली आहे. विशेष निमंत्रितांमध्ये केंद्रीय मंत्री प्रकाश जावडेकर, खासदार गिरीश बापट, माजी मंत्री दिलीप कांबळे आणि हर्षवर्धन पाटील यांचा समावेश आहे.

चंद्रकांत पाटील कोल्हापूरचे?

प्रदेशाध्यक्ष चंद्रकांत पाटील यांनी पुण्यातील कोथरूडमधून विधानसभेची निवडणूक जिंकली आहे; तसेच त्यांनी पुण्यात निवासस्थान घेतले असून कार्यक्षेत्र म्हणून पुण्याचीच निवड केली आहे. नव्या पदाधिकाऱ्यांच्या यादीमध्ये मात्र, पाटील यांच्या नावापुढे पुण्याऐवजी कोल्हापूरचा उल्लेख करण्यात आला आहे. त्याबाबत आश्चर्य व्यक्त करण्यात येत आहे.

माधुरी मिसाळ मुख्य प्रतोद

पर्वतीच्या आमदार माधुरी मिसाळ यांची पक्षाच्या मुख्य प्रतोदपदी निवड करण्यात आली आहे. यापूर्वी या पदावर असलेल्या देवयानी फरांदे यांची पक्षाच्या सरचिटणीसपदी (महामंत्री) निवड करण्यात आली आहे.

पक्षाच्या प्रदेश पदाधिकाऱ्यांमध्ये पुण्याला डावलले, असे म्हणणे अयोग्य आहे. खुद्द प्रदेशाध्यक्ष चंद्रकांत पाटील पुण्याचे आहेत; तसेच मुख्य प्रतोदपदी आमदार माधुरी मिसाळ यांची निवड करण्यात आली आहे. त्यामुळे पुण्याला डावलण्याचा प्रश्नच उद्भवत नाही.

– केशव उपाध्ये (मुख्य प्रवक्ते, भाजप)

Source link

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)