gold price reach to 51000: नवा उच्चांक; सराफा बाजारात सोन्याचा भाव ५१ हजारांवर – gold price reach 51000 for the first time

0
26
Spread the love

मुंबई : अमेरिका-चीन यांच्यातील दोलायमान संबंध, भारत-चीन यांच्यातील ताणलेले संबंध, जागतिक स्तरावर कोव्हिड-१९ (करोना) विषाणूचा वाढणारा संसर्ग, देशात पुन्हा एकदा लॉकडाउन केले जाणार अशी सुरू असलेली चर्चा, अर्थव्यवस्थेत आधीच असलेली मंदी आणि त्यात करोना संकटाची पडलेली भर या सर्वांमुळे आपले भवितव्य काय असेल, याची चिंता सर्वांनाच वाटत आहे. ही चिंता विविध वित्तसंस्थांनाही वाटत असून, त्यांनीही सोने व चांदी या मौल्यवान धातूंची खरेदी करण्याचा सपाटा लावला आहे. याचा परिणाम म्हणून बुधवारी सोन्याने उच्चांकी भावाची नोंद केली. शुद्ध सोन्याचा किरकोळ दर १० ग्रॅमसाठी ५१ हजार रुपयांवर गेला, तर २२ कॅरेट सोन्याला ४९,२०० रुपये भाव मिळाला. चांदीचा भाव एका किलोसाठी ५०,१४० रुपये नोंदवला गेला.

वाचा : उत्सवाच्या काळात ७ कोटी छोटे व्यापारी चीनला धडा शिकवणार; कसा तो वाचा!
पु. ना. गाडगीळ ज्वेलर्सचे संचालक सौरभ गाडगीळ यांनी मटाला यासंदर्भात सांगितले की, करोनामुळे अनेक देशांच्या अर्थव्यवस्था धोक्यात आल्या आहेत. भारतासारख्या देशांत आर्थिक मंदीचे सावट आणखी गडद होत आहे. त्यामुळे अनेक देशांच्या मध्यवर्ती बँकांनी सोनेखरेदीचा सपाटा लावला आहे. या बँका मोठ्या प्रमाणावर सोन्याचा साठा करून ठेवत आहेत. राष्ट्रीय स्तरावरील बँका, फंड हाउस यांच्याकडून सोनेखरेदी सध्या मोठ्या प्रमाणावर सुरू आहे. किरकोळ गुंतवणूकदारांनी एका फंडात गुंतवणूक केल्यानंतर तो फंड आणखी काही पर्यायांत गुंतवणूक करून नफा कमावतो आणि त्यातून किरकोळ गुंतवणूकदारांना परतावा देतो. परंतु, करोनामुळे गुंतवणुकीचे फायदेशीर पर्याय जसे वैयक्तिक गुंतवणूकदारांच्या हाती कमी उरले आहेत, तसेच ते गुंतवणूकदार संस्थांच्या हातीही फारसे उरलेले नाहीत. त्यामुळे या संस्था सोन्याकडे वळल्या आहेत, असे दिसते.

आंतरराष्ट्रीय दबाव

म्हाप्रळकर ज्वेलर्सचे संचालक आणि प्रमाणित वित्त नियोजक आनंद म्हाप्रळकर यांनी सांगितले की, २०११मध्ये सप्टेंबर महिन्यात सोने जागतिक बाजारात उच्चांकी, प्रति औंस (३१.१० ग्रॅम) १,९२० डॉलरवर पोहोचले होते. त्यानंतर ऑक्टोबर २०१२मध्ये ते काहीसे खाली येऊन १,७९५ डॉलरवर गेले. या एका वर्षात भारतीय रुपया एका अमेरिकी डॉलरच्या तुलनेत ४५ ते ५४ रुपये राहिला. आज भारतीय रुपया ७४ ते ७६मध्ये आहे. त्याचवेळी जागतिक बाजारात सोने प्रतिऔंस १८०० डॉलरवर गेले आहे. सोन्याच्या या हालचालीवर सध्या आंतरराष्ट्रीय दबाव स्पष्ट दिसत आहे.

वाचा :कर्ज झाली स्वस्त ; सर्वात मोठ्या बँकेने केली व्याजदर कपात
गुंतवणूक बदलामुळे भाववाढ

वामन हरी पेठे ज्वेलर्सचे संचालक आदित्य पेठे म्हणाले की, गेल्या काही महिन्यांपासून सोने सातत्याने वर जात आहे. गेल्या दहा-बारा वर्षांचा आढावा घेतल्यास सोन्याने जागतिक बाजारात प्रतिऔंस १,०९० डॉलरपासून ते १,९२० डॉलरपर्यंत प्रवास केला आहे. सध्याची भाववाढ करोना आणि राजकीय अस्थिरता या पार्श्वभूमीवर वित्तसंस्थांच्या बदललेल्या गुंतवणूक मार्गामुळे दिसत आहे. यात किरकोळ ग्राहकाचा वाटा नाही. विविध वित्तसंस्था आपला पैसा, चांगला परतावा मिळावा म्हणून कधी भांडवल बाजारात तर कधी वायदे बाजारात फिरवत राहतात. वायदे बाजारात पैसा फिरवताना तो साहजिकच सोन्यात प्राधान्याने गुंतवला जातो. याचे कारण सोनेही एक प्रकारचे चलनच आहे. सोन्याचा प्रतिऔंस भाव येत्या काही आठवड्यांत २,००० डॉलरवर जाण्याची शक्यता आहे.

सोने वधारण्याची कारणे –

– अमेरिकी डॉलरचे चलन बाजारातील वर्चस्व किंचित कमी झाले आहे.

– लॉकडाउनमुळे जगभरात तयार दागिन्यांची मागणी चालू आर्थिक वर्षाच्या पहिल्या तिमाहीत घटल्याचे वर्ल्ड गोल्ड कौन्सिलचे म्हणणे आहे. एकट्या चीनमधून दागिन्यांची मागणी ६५ टक्क्यांनी कमी झाली. त्याऐवजी सोन्याच्या विटा, चिपा, नाणी यांना प्राधान्य दिले गेले.

– देशांच्या मध्यवर्ती बँकांकडून मोठ्या प्रमाणावर सोनेखरेदी होत आहे.

– लॉकडाउनचा परिणाम म्हणून सोन्याचे उत्खनन बंद पडले. त्यामुळे जगभरात सोन्याची टंचाई निर्माण झाली आणि ही टंचाई भाववाढीला कारणीभूत ठरली.

सोन्यात सर्वसामान्यांनी गुंतवणूक करताना तिचे प्रमाण एकूण गुंतवणुकीच्या २० ते २५ टक्के ठेवणे सध्याच्या परिस्थितीत श्रेयस्कर आहे. करोनापूर्व स्थितीत हे प्रमाण १० ते १५ टक्के ठेवले तरी चालत होते. मात्र, या गुंतवणुकीचा सट्टा करू नये.

सौरभ गाडगीळ, संचालक, पु. ना. गाडगीळ ज्वेलर्स

Source link

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)