RAIN UPDATE: पहिल्याच पावसाने तारांबळ, कल्याण-डोंबिवलीत घरात पाणी – thane, dombivali rain update

0
43
Spread the love

म. टा. प्रतिनिधी, ठाणे :

ठाण्यात शुक्रवारपासून दमदार हजेरी लावलेल्या पावसाने शनिवारी ठाणे शहराला चांगलाच तडाखा दिला. मुसळधारेने शहरातील सखल भागामध्ये पाणी साचले आणि अत्यावश्यक कामांसाठी बाहेर पडलेल्यांची तारांबळ उडाली. ठाण्यात दिवसभरामध्ये १२० मिमी पावसाची नोंद झाली असून अनेक भागात पाणी साचल्यामुळे संपूर्ण परिसर जलमय झाले होते. कल्याण-डोंबिवलीमध्ये ऐन भरतीच्यावेळी पावसाचा जोर वाढल्याने शहरातील अनेक घरांमध्ये पाणी शिरले. खाडीलगत आणि किनाऱ्याच्या आसपास असलेल्या घरांमध्ये शिरलेले पाणी काढताना नागरिकांची दमछाक झाली.

ठाणे जिल्ह्यात जून महिन्यात पावसाने दडी मारल्याचे चित्र निर्माण झाल्यामुळे हवेतील उष्णता वाढली होती. करोनाच्या संकटामुळे घरामध्ये अडकलेले नागरिक पावसाची आतुरतेने वाट पाहत होते. एक-दोन दिवस तुरळक हजेरी लावून विश्रांती घेतलेल्या पावसाने शुक्रवारी दिवसभर शहरात दमदार हजेरी लावली. पावसाच्या पहिल्या दिवशी शहरात फारसे पाणी तुंबले नव्हते. परंतु शुक्रवारी रात्रीपासून सुरू असलेल्या पावसाच्या मोठ्या सरींनी सकाळपासून शहरातील वेगवेगळ्या भागात पाणी तुंबण्यास सुरुवात झाली होती. गोकूळनगर येथील वर्धमान इंडस्ट्रीचा परिसर, माजिवडा सेवा रस्त्यावरील ऋतू पार्क, आरटीओ ऑफिसजवळील रस्ता, वंदना सिनेमा परिसर, अशोक सिनेमा स्टेशन रोड, ठाणेकर वाडी येथील दत्त विजय सोसायटी, दिव्यातील विविध भागांमध्ये पाणी साचले होते. तर ओम साई इंटस्ट्रीअल इस्टेट, वागळे इस्टेट, सत्यानंद सोसायटी पाचपाखाडी, जिल्हा परिषद क्वार्टर, जवाहरबाग फायर स्टेशन परिसर, सिडको पूल, चेंदणी बंदर रोड, कोपरी पोलिस ठाणे परिसरातील रस्त्यावरही मोठ्या प्रमाणात पाणी साचले होते. यापूर्वी पाणी न साचलेल्या भागातही पाणी साचल्याने नाले आणि गटार सफाईवर ठाणेकरांकडून प्रश्नचिन्ह उपस्थित केले जात होते.

– ठाण्यात १० ते १२ ठिकाणी पाणी तुंबले

– झाडांची आणि संरक्षण भिंतीचीही पडझड

– जिल्ह्यातील ग्रामीण भागापेक्षा शहरात जोर

– कल्याण-डोंबिवलीत घरात पाणी शिरल्याने गोंधळ

– उद्यानाची संरक्षण भिंत कोसळली

ठाण्यातील वागळे इस्टेट हाजुरी पाइपलाइनजवळ खेताले गार्डनची दहा ते बारा फूट उंचीची संरक्षण भिंत कोसळली. यामध्ये कोणालाही दुखापत झाली नसल्याचे महापालिकेच्या आपत्ती व्यवस्थापन कक्षाकडून स्पष्ट करण्यात आले. शहरातील चरई, खारकर आळी आणि कोपरी या तीन ठिकाणी झाडे कोसळल्याची घटना घडली. तर नौपाडा, ब्रह्मांड, उपवन, कोरम मॉल आणि वसंतविहार इथे फांद्या कोसळल्याची नोंद झाली. वर्तकनगर, माजिवडा आणि मानपाडा भागात झाडे धोकादायक स्थितीत असल्याच्या तक्रारीही महापालिकेकडे आल्या होत्या. काही ठिकाणी पाण्यामुळे विद्युत प्रवाह रस्त्यावरील पाण्यात उतरल्याच्या तक्रारीही स्थानिकांकडून केल्या जात होत्या.

भराव, भरतीमुळे धोका वाढला

डोंबिवलीत पावसाने चांगलाच जोर धरल्याने अनेक सखल भागांत पाणी साचले. दिवा- वसई चौथ्या मार्गिकेसाठी रेल्वे प्रशासनाकडून दोन्ही बाजूला भराव टाकण्यात आले. रेल्वे रुळांलगतच्या चाळी आणि बैठी घरे सखल भागात गेली. यामुळे पहिल्याच पावसात या चाळीतील नागरिकांना पुराचा तडाखा सहन करावा लागला. डोंबिवली पश्चिमेकडील काही भागांत पाणी साचल्याच्या तक्रारी पालिकेच्या आपत्कालीन विभागाकडे प्राप्त झाल्या. यानंतर प्रशासनाच्या कर्मचाऱ्यांनी तातडीने धाव घेत साचलेल्या पाण्याला वाट करून दिली. मात्र खाडीच्या पाण्याची पातळी भरतीमुळे वाढत असल्याने नागरिक घाबरले होते. अखेर काही नागरिकांना स्थलांतरित करण्यात आल्याने दिलासा मिळाला.

धरणक्षेत्रांत प्रतीक्षा

ठाणे जिल्ह्यातील ग्रामीण भागामध्ये मुंबईला पाणीपुरवठा करणारी धरणे असून या भागात मोठ्या पावसाची अपेक्षा असली तरी दोन दिवसांत या भागात तुरळक पावसाची नोंद झाली आहे. सर्वाधिक पावसाची नोंद अंबरनाथ तालुक्यात ८३ मिमी, उल्हासनगरमघ्ये ८० मिमी, ठाण्यात ७१ मिमी, कल्याण ६० मिमी, भिवंडी ५५मिमी

झाली. तर मुरबाडमध्ये १९ मिमी आणि शहापुरात सर्वात कमी ४ मिमी पावसाची नोंद झाली. ग्रामीण भागात शेतीसाठी आणि पिण्याच्या पाण्याच्या धरणक्षेत्र असल्याने या भागात पावसाची प्रतीक्षा कायम आहे.

Source link

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)